كيف تدخل الغابة (91 )
الوطن الذي لا وجيع له
الجريف شرق
خطاب لأهلي بزمن الحرب
ربنا يحفظكم ويغطي عليكم
في إتحادنا رحمة تتجلى (وأعتصموا )
بسم الله الرحمن الرحيم
قال تعالى في محكم تنزيله
(وَاعْتَصِمُوا بِحَبْلِ اللَّهِ
جَمِيعًا وَلَا تَفَرَّقُوا ۚ وَاذْكُرُوا نِعْمَتَ اللَّهِ عَلَيْكُمْ إِذْ
كُنتُمْ أَعْدَاءً فَأَلَّفَ بَيْنَ قُلُوبِكُمْ فَأَصْبَحْتُم بِنِعْمَتِهِ
إِخْوَانًا وَكُنتُمْ عَلَىٰ شَفَا حُفْرَةٍ مِّنَ النَّارِ فَأَنقَذَكُم مِّنْهَا
ۗ كَذَٰلِكَ يُبَيِّنُ اللَّهُ لَكُمْ آيَاتِهِ لَعَلَّكُمْ تَهْتَدُونَ ( الآية (103) سورة آل عمران
السلام عليكم ورحمة الله تعالى وبركاته
🩸 اهلي الطيبين ربنا يحفظكم ويجعلكم
في رعايته وامنه يا رب
🩸 بعتذر اني عاوز اطيل عليكم وعاوز
ادخل في قصة جرب المجرب .. عشان ما نضبع القروش والزمن في نقاشات لا فائدة منها ..
عاوزين نكون على قلب رجل واحد .. وعشان يتسع فهمنا للكلمة دي .. قلب رجل واحد ما
معناها انكم تكونوا براي رجل واحد او تمشوا كلام واحد على الجمبع .. قلب رجل واحد
معناها اتفاق على الراي السديد بعد المشورة بين الاخوان والاهل
..
🩸 عشان كدا بقول نخلي همتنا كلها
لحلتنا .. ونحاول نجتهد بالالتزام بالسداد .. لانو الجاي اصعب من النحنا فيهو ..
ده معني حديث الرسول صل الله عليه وسلم .. فيما معناه .. تتعاقب الفتن كتعاقب
الليل والنهار .. وعندما تاتي الفتنة يقول الرجل انها هي انها هي .. ونسأل الله
السلامة للجميع .. عشان كدا محتاجين التزام من الجميع .. بانوا نجعل همتنا بناء
حلتنا وتأسيسها كاخوان وابناء عمومة
..
🩸 عندنا حاليا 5 مشاكل رئيسية .. الاساسيات
او الاولى باننا نوفرهم 3 مشاكل .. توفير الغذاء والدواء .. توفير المياه حتى في
حال انقطاع الكهرباء .. والمشكلة التالتة والاهم من الاتنين القلتهم فوق .. هي
تحملنا لبعضنا ونصبر على بعضنا .. وندعم الجميع معنويا وماديا .. والتشجيع على
الانفاق المادي والمعنوي .. ضروري جدا نركز على المشاكل دي .. وبقول التالتة اهم
من الاولى والثانية .. لانو لو ما اتوفرت التالتة ما بمشوا الاولى والتانية .. ولسه
بذكركم الجاي اصعب وعلينا ان ننتبه ونركز
..
🩸 المشكلة الرابعة .. وحقيقة دي
كارثية .. ولو ما قدرنا على التلاته الاوائل ما حنحلها .. وبقولا في وقتها ان شاء
الله ..
🩸 المشكلة الخامسة ودي مقدور عليها ..
فهمنا للصندوق الشهري .. بس بعض منا يعتنت .. او يعمل ما فاهم .. انو نحنا بنجمع
القروش لنساعد اهلنا .. يجيك واحد ناطي في نص نقاش انو مثلا نعمل نفرة لفلان
الفلاني .. والغريب انهم ما سددوا او سددوا جزء من المبلغ .. مع كامل معرفتي على
مقدرتهم على السداد .. ونقول ده راجع للرواسب القديم .. والمفروض ونحنا اسي في زمن
الحرب دي نتناسها شوية .. عشان الامور تمشي لقدام .. وتاني بذكركم انو الزمن الجاي
اصعب .. وما حتقدروا تواصلوا في النفرات ..
واسي حاليا ملاحظ انو في ناس بتقرا المنشورات ولا تحرك ساكنا .. وذكرت في
كم منشور انو الناس الما سددت .. لكن وللاسف في حقيقة الامر ديل اسمهم (الناس الما
عاوزة تسدد) .. وبرضو مفروض علينا نتحملهم لانهم دمنا ورحمنا واهلنا وجيرانا ..
والزول ما ببقى بدون اهل .. ولانو الفترة الجاية حتكون صعبة وكل يوم نفرة اكيد معظمنا حيزوق منها نسبة لزيادة الصرف على الاسر خلال الحرب ..
عشان كدا الصندوق بوفر لينا غطاء كافي لمواجهة الازمات الجاية
..
🩸 الناس تشد حيلا وتنسي القديم ونجتهد
في انو نكون اخوان وعلى قلب رجل واحد .. يعني (رأينا يكون واحد ) عشان امورنا تمشي
لقدام ..
🩸 نسأل الله
التوفيق والسداد للجميع
حسبنا الله ونعم الوكيل علي الجنجويد الرباطة و
القتلة و المرتزقة
ـــــــــــــــــــــــــــــــــــــــــــــــــــــــــــ
القبض علي مدير النزع و
التسويات(علاء الدين) واحتجازه بقسم حلة كوكو في قضايا تلاعب وفساد بـ أراضي
الجريف شرق ...
( نحنا مرقنا
ضد السرقوا أرضنا ) ..
--------------------------------------
التحية للمناضلين بدر
الحاج ... السر الجزولي
المناضلين عن الحق و
العرض والأهل ...
--------------------------
اللهم أرحم شهداء الجريف
شرق ... شهداء الأرض و العرض ... شهداء الدم و الرحم ...
في رحاب الله الشهيد أخوي
(أحمد عبيد) والشهيدة أمي (منى النخلي) و الشهيد خوي محمد عبد المجيد ابدقن و
الشهيد اخوي حسين عبد القادر والشهيد اخوي محمد اسماعيل ود عكر الشهيد اخوي خالد
كمال ابو ريدة و الشهيد اخوي فاروق ماهر بلال ... اللهم أجعلهم في ركاب الشهداء و الصديقين و
الصالحين ... رحمهم الله رحمة واسعة وأسكنهم فسيح جناته وسقاهم من كوثر
المصطفي صل الله عليه وسلم شربة لا يظموا بعدها أبدا ...
-------------------------
وأعود اذكر بقول جدي
الراحل (مصطفي علي عوض الكريم باعو) الشهير بـ ( الغول ) عليه رحمة الله ... (
مهما قالوا مهما كتبوا .. فالجريف من رحم واحد ) ...
محمد
باعـــــــــــــــــــــو
14/06/2023
ليست هناك تعليقات:
إرسال تعليق